"ווינטער־שול פֿון איבערזעצונג" 2025
אין דער יערלעכער פּראָגראַם פֿון דער "ווינטער־שול פֿון איבערזעצונג" בײַם פּעטערבורגער אוניווערסיטעט, וועלכע איז דורכגעפֿירט געוואָרן דעם 24סטן און 25סטן יאַנואַר 2025, איז אַרײַן אַ דרײַ־שעהיִקע ייִדיש־סעקציע. די דאָזיקע אינטערנאַציאָנאַלע אָנלײַן־פּראָגראַם איז געגרינדעט געוואָרן אין 2020.
די לעקציעס פֿונעם דיכטער יואל מאַטוועיעוו און דער פֿילאָלאָגין אָלגאַ מאַטוויִענקאָ זענען געווען געווידמעט פֿאַרשיידענע קינסטלערישע און לינגוויסטישע אַספּעקטן פֿון איבערזעצן ייִדישע דיכטונג. איינער פֿון די עיקר־טעמעס, וואָס ביידע לעקטאָרן האָבן באַהאַנדלט, איז געווען אַ זאַמלונג פֿון הײַנטצײַטיקער ייִדישער פּאָעזיע מיט פּאַראַלעלע רוסישע איבערזעצונגען, וואָס ווערט איצט געגרייט צום דרוק בראָש מיטן מאָסקווער פֿאַרלעגער באָריס זײַטשיק.
די לינגוויסטין ליובאָוו לאַווראָוואַ האָט דערציילט וועגן איר פּראַקטישער דערפֿאַרונג בעתן צונויפֿשטעלן נײַעס און אַנאָנסן אויף ייִדיש אין דער צײַטונג "ביראָבידזשאַנער שטערן", ווי אויך וועגן איר אַרבעט איבער אַן אַרטיקל אינעם צוויי־שפּראַכיקן ייִדיש־רוסישן אַלמאַנאַך "ביראָבידזשאַן", וואָס איז אַרויס גלײַך אויף ביידע שפּראַכן. בײַם צוגרייטן די טעקסטן זעצט לאַרוואָוואַ איבער פֿאַרשיידענע היסטאָרישע און קולטורעלע מאַטעריאַלן פֿון עטלעכע לשונות אויף ייִדיש.
