אַלכּסנדר גאָראָדניצקי אויף ייִדיש
דעם 18טן מאַרץ, 2023, איז דער גוט באַוווּסטער זינגער און מוזיקער פּסוי קאָראָלענקאָ אַרויסגעטראָטן אין די פֿאַראייניקטע שטאַטן מיט צוויי לידער פֿונעם סאָוועטישן און רוסלענדישן דיכטער אַלכּסנדר גאָראָדניצקי, איבערגעזעצט פֿון רוסיש אויף ייִדיש. דער ייִדישער שרײַבער יואל מאַטוועיעוו האָט זיי איבערגעזעצט ספּעציעל פֿאַרן 90־יאָריקן געבוירן־טאָג פֿונעם פּאָעט. ווי אַ ספּעציעלע מתּנה פֿאַר אונדזער וועבזײַט, האָט קאָראָלענקאָ רעקאָרדירט גאָראָדניצקיס ליד "שניי", וואָס ער האָט אויסגעפֿירט אויפֿן פֿעסטיוואַל Spring MusArt Fest אין סאָניווייל (שטאַט קאַליפֿאָרניע).
אַלכּסנדר גאָראָדניצקי איז אַ וועלט־באַרימטער געאָלאָג און איינער פֿון די גרינדער פֿונעם סאָוועטישן "באַרדישן" לידער־זשאַנער (אומאָפּהענגיקע זינגלידער מיט ענלעכע ווערטער, ענלעך צו געוויסע נײַע סטילן פֿון דער אַמעריקאַנער פֿאָלק־מוזיק אין די 1960ער). דער אַסטעראָיִד נומער 5988 טראָגט זײַן נאָמען. גאָראָדניצקיס לידער וועגן אַרקטישע עקספּעדיציעס זענען אָגעשריבן געוואָרן אויפֿן סמך פֿון זײַן פּערזענלעכער פֿעלד־דערפֿאַרונג. גאָראָדניצקי שאַצט זייער הויך די ייִדישע שפּראַך, דאָס מאַמע־לשון פֿון זײַן משפּחה, ווי אַ וויכטיקן חלק פֿון זײַן פּערזענלעכער קולטור־ירושה.