ייִדישלאַנד: נומער 25
דער נײַער 25סטער נומער פֿונעם קוואַרטאַל־זשורנאַל "ייִדישלאַנד", וואָס גייט אַרויס מיט פּאַראַלעלע טיראַזשן אין ישׂראל און שוועדן, איז געווידמעט איינעם פֿון זײַנע רעדאַקטאָרן, מיכאל פֿעלזענבאַום, וועלכער האָט ניט לאַנג צוריק באַקומען אַ פּרעמיע "פֿאַר לעבנס־דערגרייכונגען" אַלס ליטעראַט פֿון דער ישׂראלדיקער "נאַציאָנאַלער אינסטאַנץ פֿאַר ייִדיש־קולטור".
דער זשורנאַל אַנטהאַלט עטלעכע עסייען פֿון באַקאַנטע ייִדיש־מומחים, וווּ עס ווערן אַנאַליזירט פֿאַרשיידענע אַספּעקטן פֿון פֿעלזענבאַומס פּראָזע, פּאָעזיע און דראַמאַטורגיע. עס ווערן אויך פֿאָרגעשטעלט זײַנע נײַע ווערק. צווישן פֿאַרשיידן־אַרטיקע ליטעראַרישע, פֿילאָלאָגישע און היסטאָרישע מאַטעריאַלן זענען אינעם קוואַרטאַלניק פֿאַרעפֿנטלעכט געוואָרן אַ ריי לידער פֿון יעל מערליני – אַ יונגע דיכטערין, געבוירן אין איטאַליע, וואָס וווינט אין בערלין און שרײַבט לידער אויף ייִדיש.