נײַע אויסשטעלונג: Emes Truth
נײַע אויסשטעלונג: Emes Truth
אינעם מוזיי אויפֿן נאָמען פֿון בערנאַרד העלער בײַם ניו־יאָרקער "העברעיִשן פֿאַראיין־קאָלעדזש" ("היברו יוניאָן קאָלעדזש") עפֿנט זיך אַ נײַע אויסשטעלונג פֿון דער "געזעלשאַפֿט פֿאַר ייִדיש־קונסט" (Yiddish Arts Community), מיטן נאָמען Emes Truth. אין דער עפֿענונג־אונטערנעמונג, וואָס וועט פֿאָרקומען דעם 17טן דעצעמבער 2024, 5 אַזייגער נאָכמיטאָג, וועלן אויפֿטרעטן די מוזיקער שׂרה מאירסאָן און איליאַ שנייווײַס. די קוראַטאָרן זענען די קינסטלער יעווגעני פֿיקס און דבֿורה אוגאָרעץ; די באַטייליקטע קונסט־שאַפֿער זענען דניאל אַלחסיד, יוליאַ לאַנינאַ, דעבי שאָר, מרים שטערן און סילוויאַ וואַגענסבערג.
די אויסשטעלונג איז אַ פּרעלודיע צום קומענדיקן ניו־יאָרקער ייִדיש־פֿעסטיוואַל. איר נאָמען דערמאָנט אין דעם, וואָס דאָס וואָרט "אמת" איז לויט דער סאָוועטישן אָרטאָגראַפֿיע "עמעס", און אין אַ טייל חסידישע ביכער דווקא מיט נקודות – "אֱמֶת". די קינסטלער וועלן פֿאָרלייגן זייערע אייגענע פֿאַרשיידנאַרטיקע "אָרטאָגראַפֿיעס" פֿון מענטשלעכע באַגריפֿן און לעבנס־דערפֿאַרונג. דער אַרײַנטריט אויף דער עפֿענונג־פּראָגראַם וועט זײַן פֿרײַ, נאָר מע מוז זיך קודם פֿאַרשרײַבן אָנלײַן.
די לאָנדאָנער ייִדישע דיכטערין ברוריה וויגאַנד וועט דעם 1טן דעצעמבער 2024 אַרויסטרעטן מיט אירע לידער אויף אַ ספּעציעלן אינטערנעט־אָוונט, אָרגאַניזירט דורכן תּל־אָבֿיבֿער "לייוויק־הויז". די אונטערנעמונג וועט פֿאָרקומען דורכויס אויף ייִדיש – 6 אַזייגער נאָכמיטאָג לויט דער ארץ־ישׂראלדיקער צײַט. דער אַמסטערדאַמער ייִדישער פּאָעט דוד־עומר כּהן וועט דינען אַלס מאָדעראַטאָר. מע פּלאַנירט אויך צו באַהאַנדלען די לידער מיט אַנדערע דיכטער און קריטיקער. צו באַטייליקן זיך אין דער אונטערנעמונג –
אין אַמסטערדאַם איז דעם 24סטן נאָוועמבער 2024 פֿאָרגעקומען די אָפֿיציעלע פּרעזענטאַציע פֿונעם נײַעם ייִדישן זשורנאַל "די גאָלדענע פּאַווע"; דער ערשטער פּראָבע־נאָמער דערפֿון איז שוין אַרויס אין יוני. די אויסגאַבע איז אַ המשך פֿונעם פֿריִערדיקן אַמסטערדאַמער זשורנאַל "די גרינע מדינה", געדרוקט זינט 2000.
דער ייִדישער ראָמאַניסט, דיכטער און דראַמאַטורג מיכאל פֿעלזענבאַום האָט באַקומען אַ פּרעמיע "פֿאַר לעבנס־דערגרייכונגען" אַלס ליטעראַט פֿון דער ישׂראלדיקער "נאַציאָנאַלער אינסטאַנץ פֿאַר ייִדיש־קולטור". אַ דאַנק־סערטיפֿיקאַט האָט אויך באַקומען ד״ר שושנה דאָמינסקי, וועלכע האָט צונויפֿגעשטעלט אַ ייִדיש־העברעיִש אינטערנעץ־ווערטערבוך.
דער גרויסער דײַטשישער פֿאַרלאַג De Gruyter, וואָס ספּעציאַליזירט זיך אין אַקאַדעמישער ליטעראַטור, האָט אַרויסגעגעבן אַ בוך מיטן נאָמען "סאָציאַליסטישע ייִדישלענדער" אונטער דער רעדאַקציע פֿון מרים שאָרלי־שולץ און אַלכּסנדר וואַלטער, וווּ עס גייט די רייד וועגן דער ראָלע פֿון ייִדיש און נאָכמלחמהדיקע סאָציאַליסטישע לענדער, אַרײַנגערעכנט דעם ראַטן־פֿאַרבאַנד, פּוילן, מיזרח־דײַטשלאַנד און רומעניע. עס ווערן אויך אַנאַליזירט פֿאַרשיידענע בײַשפּילן פֿון אינטערנאַציאָנאַלע קולטורעלע אינציאַטיוון אין שײַכות מיט ייִדיש, וואָס זענען בשעת דער קאַלטער מלחמה דורכגעפֿירט געוואָרן צווישן די לענדער פֿונעם מיזרחדיקן בלאָק און דער מערבֿדיקער וועלט, אַרײַנגערעכנט פֿש״אַ, בריטאַניע און מדינת־ישׂראל.
