דער ניו־יאָרקער ייִדיש־פֿעסטיוואַל – 2024
דער ניו־יאָרקער "העברעיִשער פֿאַראיין־קאָלעדזש" ("היברו יוניאָן קאָלעדזש") גרייט זיך צום יערלעכן ייִדיש־פֿעסטיוואַל, וואָס וועט דורכגעפֿירט ווערן פֿונעם 21סטן ביזן 26סטן דעצעמבער 2024. אין דער פּראָגראַם וועלן אַרײַן צענדליקער אונטערנעמונגען: קאָנצערטן מיט וועלט־באַרימטע מוזיקער און זינגער פֿון ייִדישע לידער, לעקציעס פֿון גרויסע געלערנטע וועגן דער ייִדישער שפּראַך, איר געשיכטע און איר ליטעראַטור, מוזיק־לימודים, וואַרשטאַטן פֿאַר זינגערײַ און פֿאָלק־טענץ, פֿילמען אויף ייִדיש, אאַז״וו. די פּראָגראַמען וועלן אויך פֿאָרגעשטעלט ווערן אָנלײַן.
לויט די אָרגאַניזאַטאָרן, איז Yiddish New York דער גרעסטער פֿעסטיוואַל פֿון דער ייִדישער שפּראַך, ייִדיש־קולטור און ייִדיש־מוזיק אין די פֿאַראייניקטע שטאַטן. אויף זייער וועבזײַט קאָן מען אויסגעפֿינען די פּרטים און קויפֿן די בילעטן.