ווי מיר האָבן שוין איבערגעגעבן די לייענער פֿון אונדזער וועבזײַט, איז דעם 6טן יוני 2023 דערעפֿנט געוואָרן אינעם תּל־אָבֿיבֿער אוניווערסיטעט אַ דענקמאָל לכּבֿוד דעם גרויסן ייִדישן שרײַבער שלום־עליכם. דאָס איז געווען דער הויכפּונקט פֿון אַן אוניקאַלן פּראָיעקט, וואָס האָט געדויערט איבער דרײַ יאָר. דעם מאָנומענט האָבן געגעבן במתּנה צוויי פֿאָנדן: Heritage Projects Foundation (פֿאַראייניקטע שטאַטן) און Yiddish Heritage Preservation Foundation ("פֿונדאַציע פֿאַרן אָפּהיטן די ירושה פֿון ייִדיש", ישׂראל). אַחוץ אַנדערע וויכטיקע איניציאַטיוון פֿון די דאָזיקע פֿונדאַציעס, איז אונדזער וועבזײַט אויך אַ רעזולטאַט פֿון זייער טעטיקייט.
די צערעמאָניע איז דורכגעפֿירט געוואָרן בראָש מיט דער אוניווערסיטעט־אַדמיניסטראַציע. עס זענען בײַגעווען דער פּרעזידענט פֿונעם אַנשטאַלט, פּראָפֿעסאָר אַריאל פּורת, דער וויצע־פּרעזידענט עמוס אלעד און דער גענעראַל־דירעקטאָר פֿונעם "אייראָ־אַזיאַטישן ייִדישן קאָנגרעס" יעקבֿ בן־חיים. צווישן די אויפֿטרעטער זענען געווען: פּראָפֿ׳ פּורת, לעאָנאַרד בלאַוואַטניק (דער גרינדער פֿון דער "בלאַוואַנטיק־פֿונדאַציע"), דער פּרעזידענט פֿון דער "פֿונדאַציע פֿאַרן אָפּהיטן די ירושה פֿון ייִדיש" ד״ר מאַרק זילבערקוויט און ד״ר יאיר ליפּשיץ. אויף דער צערעמאָניע זענען אויך געקומען אַ ריי אַנדערע פּראָפֿעסאָרן און אוניווערסיטעט־לעקטאָרן, חשובֿע געסט, אַרײַנגערעכנט אַלכּסנדר טשערנאָוו, דער פּלימעניק פֿונעם דענקמאָל־שאַפֿער יורי טשערנאָוו, ווי אויך דזשוליע זילבערקוויט, די אויספֿיר־דירעקטאָרין פֿון דער "פֿונדאַציע פֿאַרן אָפּהיטן די ירושה פֿון ייִדיש".
ד״ר מאַרק זילבערקוויט האָט אויסגעדריקט זײַן צופֿרידנקייט און אַנטציקטקייט וועגן דער נײַער צווישן־דיסציפּלינאַרער פּראָגראַם פֿאַר ייִדיש־קולטור, וואָס ער האָט געגרינדעט ניט לאַנג צוריק. אָנהייבנדיק פֿונעם קומענדיקן יאָר 2023 – 2924, וועט מען צו דער אַקאַדעמישער פּראַקטיק פֿונעם תּל־אָבֿיבֿער אוניווערסיטעט צוגעבן ספּעציעלע שטודיעס מיטן טראָפּ ניט נאָר אויף דער ייִדישער שפּראַך גופֿא, נאָר אויך אויף חידושדיקע אופֿנים צו איר געשיכטע. אַלס עיקר־מאַטעריאַלן וועט מען באַנוצן ד״ר זילבערקוויטס וויכטיקע אַנטדעקונגען פֿון פֿריִער אומבאַקאַנטע אָדער כּמעט פֿאַרגעסענע מוזיקאַלישע, טעאַטראַלישע, ליטעראַרישע און קונסט־ווערק. מיט דער פּראָגראַם וועלן אָנפֿירן ד״ר יאיר ליפּשיץ און ד״ר רותי אַבעליאָוויטש.
נאָך דער עפֿענונג־צערעמאָניע האָט ד״ר מאַרק זילבערקוויט פֿאָרגעשטעלט דעם פֿאַרזאַמלטן עולם אונדזער וועבזײַט: Yiddish-Culture.com.
אינעם פֿאַרלאַג "ידיעות אחרונות" איז דערשינען רחל דבֿירס בוך "בירושלים היו אומרים… חוכמת הייִדיש הירושלמית בעבֿרית עכשווית ובֿנימה הומוריסטית" ("אין ירושלים פֿלעגט מען זאָגן… די חכמה פֿון ירושלימער ייִדיש אויף הײַנטצײַטיקן עבֿריתּ און מיט אַ הומאָריסטישן בײַטעם"). עס מאַכט די לייענער באַקאַנט מיט אידיאָמען, וועלכע האָבן עקזיסטירט אין ירושלימער ייִדיש, אַ גאַנץ ברייט פֿאַרשפּרייטן נאָך מיט עטלעכע יאָרצענדליקער צוריק און ביז איצט ניט נעלם געוואָרענעם ספּעציפֿישן וואַריאַנט פֿונעם ליטווישן דיאַלעקט פֿון ייִדיש, וואָס האָט זיך צונויפֿגעלייגט אינעם אשכּנזישן "אַלטן ייִשובֿ" מיט צוויי יאָרהונדערטער צוריק. יעדע אַזאַ אידיאָמע ווערט געבראַכט אויפֿן לשון פֿונעם אָריגינאַל, ייִדיש, און באַגלייט ניט בלויז מיט איבערזעצונג אויף העברעיִש, נאָר אויך מיט אַ קאָמענטאַר, וואָס דערקלערט דעם קאָנטעקסט, אין וועלכן מע פֿלעגט אויסנוצן די דאָזיקע אידיאָמע. דאָס בוך איז רײַך אילוסטרירט מיט אַלטע פּאָטאָגראַפֿיעס.
אין תּל־אָבֿיבֿ איז אין דער סעריע "ביבליאָטעק פֿון דער הײַנטצײַטיקער ייִדישער ליטעראַטור" דערשינען דער צווייטער באַנד פֿונעם "לעקסיקאָן פֿון דער ייִדישער ליטעראַטור אין ארץ־ישׂראל". ער אַנטהאַלט ביאָביבליאָגראַפֿישע אינפֿאָרמאַציעס וועגן יענע ייִדישע שריפֿשטעלער, וועלכע האָבן געלעבט אין ארץ־ישׂראל אין דער תּקופֿה פֿונעם בריטישן מאַנדאַט און אין דער אומאָפּהענגיקער מדינת־ישׂראל. דער ערטשער באַנד פֿונעם לעקסיקאָן איז דערשינען אין 2021. רעדאַקטאָרן צונויפֿשטעלער פֿון דער דאָזיקער אוניקאַלער אויסגאַבע זײַנען וועלוול טשערנין, מיכאל פֿעלזענבאַום און דובֿ־בער קערלער.
אינעם חיפֿהר פֿאַרלאַג "פּרדס" איז דערשינען אין העברעיִשער איבערזעצונג פֿון בלהה רובינשטיין שלום אשס ראָמאַן "דער מאַן פֿון נצרת". דער דאָזיקער ראָמאַן איז פֿאַרעפֿנטלעכט געוואָרן אויף ייִדיש אין 1939, און אין 1953 איז ער צום ערשטן מאָל דערשינען אויף העברעיִש אין איברעזעצונג פֿון דוד סיוון.
